Luk 8 | ASO | STEP | Neloti' ngomo ma nomino alinge' nene Izesu' aza nGalilaia numuno ebe' ngomo nabaku' nene mone mone ogo O'moso'mo gizebo o-ledaa' neine' ne'mi gamazi lamine' nesi nene do vo lo-ngeme ngeme' o'mo monine'. Ne'mine o'mo vingu' nene eze izipahala zuho tuvelu nesi nene maka' monani'.

Luke 8

Izesu' Gono Do Do Moningu' Vene' Masi E'meti Vani' Gamazi

1 Neloti' ngomo ma nomino alinge' nene Izesu' aza nGalilaia numuno ebe' ngomo nabaku' nene mone mone ogo O'moso'mo gizebo o-ledaa' neine' ne'mi gamazi lamine' nesi nene do vo lo-ngeme ngeme' o'mo monine'. Ne'mine o'mo vingu' nene eze izipahala zuho tuvelu nesi nene maka' monani'. 2 Ido' vene' ma Izesu' gomu' sikalahu' goloso lu'ninguti' ngimisele huline' venekisi ido' inite' gizi dani' do guno o-ngidine' venekisi nene maka' monani'. A'mingu' vene' ma nene Malia' minine' nene ezemu' Mangadalati' vene' ve li-daa' ani' vene' minine' ei' lulouti' nene sikalahu' goloso seveni Izesu' gomu' ngimisele huline' ve. 3 Ido' vene' ma nene Helode' numudo' gizebo ve Kuza' elenaho Zoana' nesi ido' Susana' nesi ido' vene' linge ma nesi nene maka' Izesulesi vani' ve. Ingine a'mine vene' nete nene Izesu'nisi izipahala zuho nesi nene engi' inite' mata' ido' noso' nite'ine nedunu' nene nasahili' i-ngidi hize ele' i-ngidavo monani' ve.

Zuho Nite' Tile' Oga' Ivemu' Aneza Gamazi

(Mataio' 13:1-9; Maleko' 4:1-9)

4 Ido' evene' muki' nene Izesuda ika' ika' navo numudoti' numudoti' nesi nene golovo' izi igi nihitavo ningo aneza gamazi ma ti' lo lo-ngimine': 5 Ve ma zuho inite' tile' oga' ive nene zuho inite've tile' olosa vine'. Vo mo tile' o'mo novivo linge ma nene aka gahevela di'mozi minikevo evene' nete a'mido' lisi di goloso ikevo nama nete igi di nani'. 6 Ido' linge ma nene gehedo' di'mozi gala ho'li dizani'za gehedo' mino misubo nene naba minamo goko' gidini minidi'mo nene gulugulu izani'. 7 Ido' linge ma gasava guvise hukikevo luhive ma ha miningu' di'mozi gala ho'li dizani'za gasava guvise nene gohi dizi mili hiti-ngidani'. 8 Ido' ne'mine ani'za linge ma misubo lamineto' di'mozani' nete nene gala ho'li dizi gihile izani' nene hamo hamolite vanu hadeti (100) ne'mine izi'mi vani' ve line'. Ne'mine lo ti' lo line': Gatine ngolo' live nii ma nene gili lamine' igi gililo.

Aneza Gamazi Nanitekumu' Lo-ngemaa' Ine' Nehe Nemu' Lo-ngimine' Gamazi

(Mataio' 13:10-17; Maleko' 4:10-12)

9 Ne'mine lo lavo a'mine aneza gamazi ne'mi' monovomu' izipahala zuho nete longo' i-dikevo 10 Izesu' aza ti' lo lo-ngimine': O'moso'mo gizebo o-ledelingumu' suno' gamazi nene lengi' ha gililisave lavo lo soto' o-lengemaa' nouvoni'za evene' ma ato ato' nene aneza gamazivo' gililizave lo lo-ngemaa' nouve. Ne'mine nouvoni' nene ingine ningi ningi ningilizaha ninge lamine' amilisave. Ido' gili gili gililizaha gili lamine' amilisave losa nene aneza gamazivo' lo-ngemaa' nouve.

Aneza Gamazi Zuho Initekumu' Line' Ne'mi Monovo Lo-ngimine'

(Mataio' 13:18-23; Maleko' 4:13-20)

11 A'mine gepe' gamazi luvoni' ma nene ne'mino neive: Zuho inite' nene O'moso'mi gamazi ne'minosa nene neive. 12 Ido' zuho inite' ma akalo' di'mozikevo evenelite lisi di goloso ikevo namalite nave luvoni' ma nene evene' malite O'moso'mi gamazi nene gilani'za gili di lu'ningu' milalisa ani' nene ve goloso ne'mo gili ele'vole' ikevo O'moso'mo do ngu' izalive lo ogo a'mine gamazi nene do vaa' neingumu' luvoni' ve. 13 Ido' gehedo' di'mozave luvoni' nene evene' ingine mono' gamazi nene gili ngolize izi lite' li lu'ningu' di go'zi gili ele'vole' ani'za di gili' li damavo luhise'ine damivo gamene ha'na gili ele'vole' amavo ngemengu' soto' o ngimingu' nene mo mudise limi ingaa' nave. 14 Ido' ma nene gasava guviseu' di'mozi gala ho'li dizani'za gasava guvise goloso ne'mo molo hite-ngidive luvoni' nene evene' ma ingine O'moso'mi gamazi nene mo gili a'mido' e'meti vani'za oko'ine losuvo'mi inite' do soto' ogakumu' gopo ga'ine gilaa' ido' moni henenimu' gilaa' ido' me misubou' initekumu' gopo ga'ine gilaa' ani' ne'mo O'moso'mi gamazi nene molo hitavo inginela nene gulupese ogo gihile izesa'mine' ve. 15 Ido' misubo lamineku' di'mozi gala ho'li dizi gihile izave luvoni' ma nene evene' ma a'mine O'moso'mi gamazi nene li-ngimikevo lite' li gili di monovo'ine laminetoti' ido' lu'ine laminekisi minadoti' mono' nene di gili' li dani' nene ingine gosele' ngebelamivo a'mine mono' nene di gili' li di mini mini di dizi minikevo ne'mo nene engita gihile lamine' ize'mo vo minaa' neive.

Lo-ngimine' Gamazi Nene Di Halekamilizangumu' Aneza Gamazi Lamulo' Lo Molosa Lo-ngimine' Gamazi

(Maleko' 4:21-25)

16 Evene' ingine livi' lamu vite' igisa somo naba a'mido' ma hitikisa'mave. Ido' a'mine lamu nene vite' igisa sebengu' ma di milikisa'mave. Asi evene' numungu' dizilizave nene hize labana' ele-ngedelingumu' soto' lamu molaa' holomolo' milalisave. 17 Ido' a'mine'mine ogo idise mene hito neine' inite' muki' nene alinge' soto' oloseive. Ido' idise mene haleko suno' neine' inite' muki' nesi nene soto' ogavo ningi gililisave. 18 Ve ma ingine mono' ma di minilizave nene O'moso'mo gohi ma ngemavo di vai' li minilisave. Ido' mono' ma di minamilizave nene ingine mono' nene mo do none li gili ma di nilizani' nesi nene ipe' ogo do voloseive. Lingine mono' gilili ma nene gopo abeleni abeleni igi gilami di guni igi gili guni igisa gililo.

O'moso'mo Gala Gilidokovo' E'meti Igi Mili Minaa' Nave Engi' Neevo' Nene Neze Zuho Gihile Minilisave Lo Izesu' Lo-ngimine'

(Mataio' 12:46-50; Maleko' 3:31-35)

19 Ido' Izesu' izelehosi ido' nakunolomotesi nene Izesu' neida ani'za numungu' nene evene' giki' ikevo neido' ngeli vamilizado' ogavo heta ha minani'. 20 Oti nizavo evene' nete izahosi nakuna zuhosi heta gei' ningi-gidilisa igi oti nizave li Izesu'ni li-imani'. 21 Li-imani'za Izesu' aza ti' lo lo-ngimine': Neze ize'neho ido' naku'ne zuho nene ve ma ingine O'moso'mi gamazi gili a'mido' e'meti igi mili iga' ave nene nizave lo line'.

Izesu' Hepe' Naba Iline' Nene Do Zou Lo-dine'

(Mataio' 8:23-27; Maleko' 4:35-41)

22 Ido' gamene ma izipahala zuhosi sipiu' dizi izipahala zuho ti' lo lo-ngimine': Laza noso ohuno mene hulo helala holene volone. Lavo mo vani'. 23 Mo nosolo' ledi nivavo Izesu' nene okise ongani'. Ongo neivo hepe' naba goloso elo noso nene golo gidini ele' ala' ogo noso nene sipiu' velo nodizivo ingine nene ganala di helaa' akalo' mini mili minani' ve. 24 Ne'mine neivo izipahala zuho ingine vi Izesu'ni u'muko' igi ti' li li-imani': Ve naboo, ve naboo, laza nene mo osu' loso' o neine' lae. Likevo aza oto hepe' nesi noso monine' nesi nene ngelemavo hepe' nene matavo noso nesi mato ngi lo lamine' minine'. 25 Ne'mine ogavo izipahala zuho nene ti' lo lo-ngidine': Lingine nene O'mosola gili ele'vole' ilizanako nanimu' gili ele'vole' amave. Ne'mine lavo izipahala zuho ingine ngehelele goloso izo vo'ine vavo ti' li li volelo' melo' ani': Ve me'mo hepe' masi noso masi matilisive lo-ngedavo gamazi've gili dikesiko ve mene atoli'mine ve goloso noloseive li lani'.

Gelegesa Vetida Sikalahu' Goloso Evene' Lulouti' Izesu' nGimisele Huline'

(Mataio' 8:28-34; Maleko' 5:1-20)

26 Ne'mine igi ingine nene nGalilaia noso ohuno ne'mi helala Gelegesa misubola vi hetelani'. 27 Vi heteli Izesu' sipiuti' lemo noso gahevela novivo a'mida minine' numuno ebekuti' ve sikalahu' goloso lulou' minive masi votene' asine'. A'mine ve nene mo gamene ha'nalo' oko'nolo' inite' ma izamo mino numungukisi ongosa'mo gonoso galese minida mono ongoka' ogo monaa' ine'. 28 Ne'mino neivo evenelite senidunu' gizene analo' nene nala' izi-di gizebo i-daa' ani'za sikalahu' goloso ne'mo a'mine seni nala' nene izo huko evene' nene ele'mizo ebe' hadivela vaa' ine' ve. Ido' Izesukisi votene' igi a'mine ve ne'mo Izesu'ni nene ningo geke' lo Izesu' velela vo lemo pou' lo ongavo a'mine sikalahu' goloso ne'mo gamene gamene a'mine ve'mi lulou' nene minavo nemu' nene Izesu' aza sikalahu' goloso nemu' sikalahu' goloso gaza ve ne'mi lulouti' nene hulo-do lemo ogo vozo lo-dine' ve. Ido' a'mine gamazi lo-dingumu' a'mine ve ne'mo gamazi naba lo ti' lo line': Izesuvo, O'moso dizo minive'mi gipele mene gaza nouvoda naniteka' nane. Nenita mulumo gono nemamiline losa geita amuzonga nolo-giduve. 30 Ne'mine lavo Izesu' aza a'mine sikalahu' goloso lulou' minive nene ti' lo longo' o-dine': Gaza guliveka nene zaho nane. Ne'mine lavo sikalahu' goloso lulou' minive aza sikalahu' goloso vai' minani' nenako nemu' nene aza gulive've nene Mangilise' nouve line'. 31 Lavo sikalahu' goloso ingine limisele hulo galese lulou' amilive li amuzonga li geligelinga lani'. 32 Ido' a'mida golola nene ize muki' goloso galese ni nizavo sikalahu' goloso ingine a'mine izeliti lu'ningu' nene limisele hulavo vo dizelone li Izesuda amuzonga goloso lani'. Ne'mine likevo vi a'mingu' dizilizave lo Izesu' gele ngimine'. 33 Ne'mine ogavo ingine a'mine eveneli'mi lulouti' limi vi ize neti lu'ningu' dizikevo ize mulise ingine mangilise hizi loti' izi golo aveselo' nene limi noso ohunou' vi noso nii hilani' ve.

34 Ne'mine ikevo ize gizebo ve ingine golise vi a'mine ningani' inite' nemu' a'mida numuno ebe' nabau' nesi ido' hazala nesi nene li-ngimi osu' lani'. 35 Ne'mine ikevo evene' ingine a'mine soto' ine' inite' nene ningelone li Izesu' neida igi ningani' nene a'mine lulouti' sikalahu' goloso limi igi vave nene gamazi gelaa' inite've maduno nesi nene mo lamine' ogavo genegana've nesi do izo Izesu' gizeneu' mito' mino gapepe' o neivo ningi ngehelele izine'. 36 Ido' ve ma ingine a'mine sikalahu' goloso lulou' minave Izesu' do lamine' o-dine' ningave nete a'mine monovo nemu' evene' muki' li-ngimani'. 37 Ne'mine ikevo Gelegesa misubou' aleve ingine nene ngehelele naba goloso izavo engi' misubo nene hulo vilive li amuzo mili Izesuda lani'. Ne'mine likevo gohi sipiu' dizo tine' molo vine'. 38 Novivo sikalahu' goloso lulouti' do hulo-ngidive aza Izesuda gi'mizo maka' monelove lo amuzonga line'za Izesu' aza o've lo imisele hulo ti' lo lo-dine': 39 Gaza nene numungala vo O'moso'mo amebe inite' o-gidine' nemu' nene ne'mine o-nidive lo lo soto' ogo lo-ngemezo. Ne'mine lo-davo sikalahu' goloso lulouti' igi vave aza a'mida minine' numuno ebeku' nene vo Izesu' amebe inite' o-dine' nemu' lo-ngeme ngeme' o'mo vine'.

Izesu' Aza Zailo' Aluvosi Ido' Venelite Ike'nilo' Ike'nilo' Ningaa' Nani' Siki Nene Gamene Ha'nalo' Mate-desa'mivo Minine' Venekisi Do Lamine' O-ngidine'

(Mataio' 9:18-26; Maleko' 5:21-43)

40 Ne'mine ogavo evene' ingine Izesungumu' gizebo igi nizavo Izesu' aza tine' molo vo hetelavo geke' voke' li-dani'. 41 Ne'mine nili-davo ve ma mono' numudo' gizebo ve gulive Zailo' aza aluvo kilisimasi've tuvelu (12) ne'mido' minine' aluvo hamo' nene mo nohilivo loti' izo ogo Izesu' gizeneu' lemo golo hizo Izesu' nene numu'veuko alive lo amuzonga lo-dine'. Ne'mine lo-davo Izesu' aza a'mida novivo evene' muki' nene mulolo' mulolo' igi e'meti vani'. 43 Ne'mine igi nivavo vene' ma venelite ike'nilo' ike'nilo' ningaa' nani' siki nene mate-desa'mivo mino gamene ha'nalo' ninge do vo neivo kilisimasi tuvelu do hulo minine'za ve malitesi ma di lamine' i-damavo ha minine' nene 44 Izesu'ni e'meto mehenela ogo genegana've ne'mi lolovola do gelavo a'mido' lite' lo siki inite've minine' nene oku' lo-dine'. 45 Ne'mine ogavo Izesu' aza oko'nelo' zaho do gilive line'za evene' muki' ingine nene laza ma do gelamune li o'ove likevo Petolo' aza ti' lo line': Evene' nabazo, evene' muki' goloso mulolo' mulolo' igi nizave nete gei' okongalo' nene hitikeve lo line'. 46 Ne'mine line'za Izesu' aza ti' lo line': Evene' mali'mo oko'nelo' do gelavo nenitati' amuzo ezela vine' nene mo gelekuve lo line'. 47 Ne'mine lavo oko'nolo' do giline' vene' aza nene monovo'ne mo soto' ogave lo gelo luvo luvo ize do ogo Izesu' velelo' lemo golo hizo ongo Izesu' genegana'velo' do giline' nene nanitekumu' do gilihe ne'mi monovosi ido' venelite ike'nilo' ike'nilo' ningaa' nani' siki inite' ningo minine' lite' lo osu' lo-dine' monovo nemukisi nene evene' muki' neti ve'nido' lo soto' ine' ve. 48 Ne'mine ogavo Izesu' aza ti' lo lo-imine': Aluneve, gele ele'vole' anidi'mo nene lamine' ogange. Mulungau' hongu lo lamine' o minivo vozo.

49 Ne'mine lo nolivo mono' numudo' gizebo ve'mi numungukoti' evene' ma ogo ti' lo line': Gaza aluva ma nene mo helave. Nemu' nene gaza tisa'ni nene lihiteheka lo gohi ele'mizo amozo. 50 Ne'mine line'za Izesu' aza gelo mono' numudo' gizebo ve nene ti' lo lo-imine': Gaza gopo gaka gelamo aluva ha do lamine' o-delongumu' nene gele ele'volekovo' nene ogo minezo. Ne'mine oganivo aluva neve lamine' oloseive. 51 Ne'mine lo mo aluvo hilive'mi numudo' ogo hetelo evene' muki' nene aza numungu' dizelongu' nene ma dizamavo Petolo' ve Zohane' ve Zakobo' ve ido' alungo ne'mi izelehoi melehoi engi' neevo' nene dizilisave ido' evene' muki' nene o'ove lo lo huko-ngidine'. 52 Ne'mine lavo numungu' dizangu' nene evene' muki' ive nama igi mulumo alumo gili minani'za Izesu' aza ti' lo line': Alungo nene helamine' haza okise ongo neize. Lingine ive nama amilo. 53 Ne'mine line'za evene' a'mingu' minave ingine alungo nene mo helavo ningi gili nizani' nenako nemu' Izesu'ni nene gize' i-dani'. 54 Gize' i-dani'za Izesu' aza alungo nene analo' nodo vise lo-do ti' lo line': Izipaha'ne, otevo. 55 Ne'mine lavo vonahaza gohi omo izavo lite' lo otine'. Otavo Izesu' aza a'mine alu nene naline' inite' ma imilizave lo line'. 56 Ne'mine lavo alungo ne'mi izelehoi melehoi nene vo'ine goloso vavo minasine'za Izesu' nene a'mine gamazi nemu' evene' vetete' igi li-ngimamilizave lo lo huko-ngidine' ve.